Direktè Vwadlamerik ak Deutsche Welle kritike Vandredi aksyon kontwolatè medya La Tiki pran pou bloke aksè ak kontni yo.
Konsèy Siprèm Radyo ak Televizyon La Tiki a, ke moun konnen kom RTUK, bloke kontni nan lang Tik sou sit nouvèl VOA ak DW yo Jedi apre tou le 2 medya yo te derefize aplike pou lisans jan kontwolè a te mande pou yo fè'l.
Nan mwad Fevriye a, RTUK te bay 3 medya entènasyonal, pami yo Sèvis TIk VOA a yon avètisman ke li dwe obteni yon lisans pou difize nouvèl si li pa vle pou yo bloke kontni li.
Ilhan Tasci, yon manm komite kap jere RTUK ki se manm Pati Popilè Repibliken an ak yon kritik demann lisans la deklare sou Twitter Jedi ke aksè ak Sèvis Tik VOA a ak DW bloke apre desizyon yon tribinal pran.
Blokaj la afekte sit nouvèl VOA Tik la - amerkaninsesi.com ak tout sèvis de lang DW yo.
"Aksè ak DW Turkce ak Vwadlamerik, ki pat aplike pou lisans bloke apre yon desizyon Kou Kriminèl Lapè Ankara a pran sou demann komite TRUK a," Tasci deklare Jedi. "Men libète laprès ou ak demokrasi avanse'w!" li ajoute.
Desizyon lisans ki te pran nan mwad Fevriye a baze sou yon règ ki te antre ann aplikasyon nan mwad Out 2019. Nan epok la, plizyè militan kap defann libète lalprès te soulve kè sote dèske sa taka debouche sou baboukèt nan bouch laprès si RTUK gen otorite pou'l kontwole tout kontni kap pibliye sou entènèt la.
Direktè adjwen RTUK a, Ibrahim Uslu, pa bay kè sote sa yo anpil enpotans. Li di desizyon an pa gen "anyen pou wè ak baboukèt men se pito yon mezi teknik."