Depatman Jistis Etazini voye fè VOA Kreyòl konnen pa email ke li akize ofisyèlman jodia, Ayisyen Jean Pelice alyas "Zo" pou wòl li te jwe nan kidnapping ak zam 16 sitwayen Ameriken ann Ayiti, nan sezon otonn 2021 an. Misye se manm gang "400 Mawozo".
Viktim yo se misyonè kretyen ki tap viv ann Ayiti e gang lan te kenbe yo ann otaj pandan 61 jou anvan yo te chape poul yo.
Pelice, 27 an, anba kod Ozetazini depi 16 Me 2022. Otorite yo Ameriken yo te gen yon manda d'arè kont li. Depi lè a li fèmen nan prizon. Pelice fè premye parèt li devan yon tribinal nan washington apremidi a.
Avoka Matthew M. Graves, ki se avoka gouvènman Ameriken an nan Washington, epi John Bernardo, Ajans Espesyal A.I. kap dirije Biwo FBI Miami an fè anons la jodia.
Akizasyon ki lanse jodia gen rapò ak kidnapping 17 misyonè Kretyen 16 Oktòb 2021 tou pre Potoprens. 16 pami viktim yo se sitwayen Ameriken - pami yo 5 timoun, e yon ti bebe 8 mwa. Dapre dokiman la jistis, Pelice ansanm ak lòt manm gang 400 Mawozo a te sèvi ak zam pou veye misyonè yo. Gang 400 Mawozo a te mande yon ranson pou lage misyonè yo e youn nan objektif gang la te site pa rapò ak otaj li te kenbe yo se egzije gouvènman Ayisyen an lage Joly Germine, lidè 400 Mawozo a, ki te fèmen nan prizon. Gen 2 otaj ke yo te lage 18 Novanm 2021, epi 3 lòt te jwenn liberasyon yo 5 Desanm 2021. Rès gwoup otaj yo te chape poul yo 16 Desanm 2021.
Germine, alyas "Yonyon" fèmen nan prizon Ozetazini tou depi 10 Me, 2022. La jistis akize li dèske li te konplote pou'l komèt yon kidnaping. Li plede non koupab.
Se Biwo FBI nan Miami kap jere envestigasyon sa a. Avoka gouvènman Ameriken an se Karen P. Seifert, ak asistans Espesyalis Paralegal Jorge Casillas, ki travay pou biwo Avoka Gouvènman Ameriken an nan vil Washington.