WASHINGTON, DC —
Prezidan ameriken an, Donald Trump, fè konnen li pral nonmen William Barr kòm nouvo minis jistis. Misye Barr te okipe pòs sa a deja sou administrasyon defen Prezidan George H.W. Bush.
Pandan Prezidan Trump t ap pale avèk laprès tou prè La Mezon Blanch, li deklare: "Barr se yon nonm ekselan; yon nonm briyan. Depi sou premye jou administrasoyn m nan, se li m te vle chwazi. Li gen respè Repibliken yo; li gen respè Demokrat yo."
William Barr se yon repibilken e pwofesyon li se avoka pou gwo konpayi yo. Si Sena a konfime nonminasyon li, li pral ranplase minis jistis pwovizwa a, Matthiew Whitaker. Mwa pase a gouvènman an te nonmen Whitaker pou l dirije depatman jistis la pwovizwaman aprè Prezidan Trump te revoke Jeff Sessions ki te okipe pòs la..