Yon jij federal Ameriken admet ke yo ka oblije kache anpil pati nan affidavit FBI te prezante pou esplike poukisa li te vle fouye kay ansyen Prezidan Donald Trump la, Mar-a-Lago. Jij la di pati yo oblije kache yo ka lakoz dokiman an "pa fè sans" si yo pibliye'l.
Sepandan li te fè konnen Lendi, li kwè yo ta pata dwe kache li, akoz gwo enterè piblik ki egziste pa rapo ak ankèt la kap pousiv.
Jij Bruce Reinhart te pase lod bay Depatman Jistis la semèn pase a pou'l pwopoze ki pati enfomasyon an yo ta dwe kache si yo rann dokiman an piblik.
Dat limit li te fikse pou sa fèt sete Jedi 25 Out a midi (lè Washington).
Depatman Jistis la vle pou tout dokiman an rete sekrè paske li di si li devwale pati affidavit la sa takapab gen move konsekans epi mete an danje ankèt li. Depatman an di sa takapab pibliye tou teknik yo sèvi lè yap mennen envestigasyon. Yo konseye jij la ke sa yo pral pwopoze a tèlman anpil ke piblik la patab gen okenn nouvo enfomasyon.
Reinhart te admèt ke se yon vre posibilite men ke li va fè detèrminasyon sa a apre yo soumèt ba li dokiman pa yo.
Plizyè medya Ameriken, pami yo Associated Press, ankouraje jij la pou'l devwale lot dokiman ki gen rapo ak fouy ki te fèt lakay Trump la, Mar-a-Lago.
FBI te rekipere 11 seri dokiman sekrè pami yo dokiman ki te gen etikèt sekrè maksimom, lakay Trump nan eta Florid.
Enfomasyon pou repotaj sa a soti nan Associated Press