Otorite Ameriken yo sispann yon aplikasyon mobil ke moun sèvi pou pran randevou pou mande azil sou fwontyè Texas la. Desizyon sa a pran apre militan yo te lanse avètisman bay otorite Ameriken yo pou di gen moun kap fè migran yo chantaj sou App la.
Sèvis Pwoteksyon ak La Dwann poko di poukisa li deside sispann bay randevou sou App CBP One nan, pou migran kap chache travèse depi vil Laredo, Texas.
Chanjman an antre ann aplikasyon 3 Jyen.
Migran yo di Associated Press ke responsab imigrasyon Meksiken yo sou fwontyè Texas la nan Nuevo Laredo pran dokiman vwayaj yo. Yo di responsab yo menase pou yo fè yo rate randevou yo te gen pwograme pou mande azil, si yo pa peye yo.