Etazini-Politik: Gouvènman an Rete Fèmen aprè Rankont Prezidan Trump ak Lidè Demokrat yo

Ozetazini, aprè yon rankont moun t ap tann anpil ant Prezidan Donald Trump avèk lidè Demokrat yo nan Kongrè a, pwoblèm grav ki poze avèk fèmti gouvènman federal la pa jwenn yon solisyon. An fèt, aprè yon chata-tande ki te dire anviwon 4 trèdtan, tou lè 2 kan yo sòti dozado, pwoblèm nan pa rezoud jan prezidan Chanm Depite a, Nancy Polosi (D-Kalifòni) ak lidè monorite demokrat la nan Sena a, Chuck Schumer (D-NY), te gen pou di sa nan deklarasyon yo fè pou laprès aprè rankont la.

Rapò lidè Demokrat yo mete devan jounalis yo ta pral jwenn konfimasyon pi ta nan men Prezidan Trump nan 2èm konferans pou laprès li bay depi ane a kòmanse. Prezidan Trump di “gouvènman an ap rete fèmen menm pandan 1 nan” si Demokrat yo pa pèmèt Kongrè a apwouve yon bidjè ki prevwa plis pase 5 milya dola pou konstriksyon yon miray ant Lèzetazini avèk Meksik.

Defi k ap Tann Nouvo Prezidan Chanm Depite Ameriken an, Nancy Pelosi.

Depite Nancy Polosi prete sèman nan jounen jedi 3 janvye 2019 la kòm nouvo prezidan Chanm dè Reprezantan an, sa ki kore kalite li kòm fanm ki pi puisan nan tout istwa politik peyi a. Se an menm tan kòmansman yon nouvèl epòk kote gouvènman federal a divize, sètadi yon pati gen kontwòl pouvwa egzekitif la (Pati Repibliken an), yon lòt pati gen kontwòl Chanm Depite a (Pati Demokrat la). Sitiyasyon sa a pare teren an tou pou yon rivalite politik maloul ant Madam Pelosi avèk Prezidan Donald Trump.

Le fèt ke Madam Polosi rive monte pou yon 2èm fwa nan tèt Chanm Depite a, sa reprezante 2èm okazyon nan 50 tan ke yon depite –ki te okipe plas Speaker of the House, kidonk prezidan la chanm nan- jwenn mwayen retounen nan pòs sa a ankò. Nancy Pelosi –ki rive chanje yon tradisyon kote fanm pa t okipe gwo pòs nan politik peyi a- genyen pou l anonse anvan lontan ki apwòch l ap anplwaye pou l leve gwo defi fèmti gouvènman federal la reprezante a.

Imedyatman apre prestasayon sèman Nancy Pelosi, Chanm Depite a te apwouve yon pwojè depans ki ta kapab rezoud pwoblèm nan pou jous 30 septanm 2019 la. Men, kesyon ap poze pou mande eske novo prezidan lachanm nan pral gen talan negosyatè ki nesesè pou l fè Sena a, ki anba kontwòl Repibliklen yo, apwouve pwojè a. Li difisil pou yon moun reponn kesyon sa a aprè echèk rankont ki fèt jedi 3 janvye a ant Prezidan Trump avèk lidè Demokrat yo nan Kongrè a.

Etazini: Reouvèti Gouvènman Federal la Toujou nan yon Enpas