Depatman Justis Etazini remet bay yon jij federal yon adaptasyon affidavit ki te sèvi kom jistifikasyon pou fouye kay ansyen Prezidan Donald Trump nan eta Florid la, kote yo tap chache dokiman sekrè.
Jij Bruce Reinhart te pase lod bay Depatman Jistis la semèn pase a pou'l pwopoze ki pati enfomasyon an yo ta dwe kache si yo rann dokiman an piblik.
Dat limit li te fikse pou sa fèt sete Jedi 25 Out a midi (lè Washington).
Anthony Coley, yon potpawol Depatman Jistis la konfime ke yo remet dokiman an bay Jij Reinhard jan li te mande'l la men li pat vle fe okenn komante sou sa.
Dokiman Depatman Jistis la pa piblik, e li pa klè si jij la pral deside pibliye'l ni konbyen enfomasyon lap devwale.
Plizyè medya Ameriken, pami yo Associated Press, te ankouraje jij la pou'l devwale lot dokiman ki gen rapo ak fouy ki te fèt lakay Trump la, Mar-a-Lago.
Trump bo kote pa'l tou te mande sou rezo sosyal li yo pou yo pibliye dokiman sa yo. Avoka li yo poko di anyen sou sa.
FBI te rekipere 11 seri dokiman sekrè pami yo dokiman ki te gen etikèt Top sekrè, lakay Trump nan eta Florid.
Trump mande tribinal federal Florid la pou'l nomen yon jeran pou sipevize pwosesis kote FBI la pral revize dokiman yo sezi lakay li.