Minis Jistis Etazini, Merrick Garland sipoze anonse rezilta ankèt yo mennen pandan 2 zan sou Depatman Polis Minneapolis la, apre lanmò George Floyd.
Ankèt la te tanmen nan mwad Avril 2021, yon jou apre polisye Derek Chauvin te jwenn kondanasyon devan tribinal pou lanmò Floyd nan mwad Me 2020. Floyd se yon nwa Ameriken ki te mouri apre lapolis te arete l epi kenbe jenou yo sou kou li jous tan li mouri toufe. Li te plede ak yo plizyè fwa pou yo leve pye yo paske li patka respire.
Lanmò misye te deklanche plizyè mwa manifestasyon popilè kote Ameriken te pran lari pou pwoteste kont enjistis rasyal.
Detay sou anons Garland ta sipoze fè Vandredi poko pibliye.
Yon nòt pou laprès Depatman Jistis la pibliye di, Garland ap gen avè l Majistra Jacob Frey, Chèf Polis Minneapolis Brian O'Hara, ak plizyè lòt moun.