Chinwa Ameriken yo divize sou vizit lidè Chanm Depite ameriken an, Nancy Pelosi, fè nan Taywann nan. Yon vizit ki soulve kondanasyon Lachin.
Tandiske kèk Chinwa Ameriken bat bravo pou deplasman sa a, gen lòt ki gen kèsote dèske vizit la ta ka degrade plis toujou relasyon ant Etazini ak Lachin epi debouche sou plis atak anti Chinwa ak rasism Ozetazini. Russel Hsiao se direkte egzekitif Taywann Global Institute. Li deklare:
"Mwen kwè pèp taiwanè a ak gouvènman zile a tou akeyi vizit la ak tout kè yo. E se konsa sa dwe ye. Ou gen reprezantan demokrasi ki pi puisan nan mond lan k ap vizite yon peyi demokratik parèy li, Taywann, pou montre sipò li pou Taywann, se yon demonstrasyon pwisan solidarite avèk pèp la."
Nan foto sa a ke Biwo Prezidans Taiwan nan pibliye, Lide La Chanm de Reprezantan Etazini Nancy Pelosi (mitan goch) rive ak Prezidan Taiwan Tsai Ing-wen pou yon rankont nan Taipei, Mekredi 3 Out, 2022.
David Lee, direktè egzekitif Komite Edikasyon Elektè Amerikano-Chinwa yo, di opiyon yo depaman nan kominote chinwa a. Li bay eksplikasyon sa a:
"Gen 2 pwendvi nan kominote a. Gen sa k pwo Taiwan e yo kwè demonstrasyon sipò Etazini pou Taiwan nan se yonbagay ki trè zenpòtan. Gen lot ki santre atansyon yo sou pi bon relasyon ant Lachin Kominis ak Etazini. Yo kwè vizit la agrave relasyon yo nan moman kote bagay yo deja difisil."
Lachin te konvoke Anbasadè ameriken an nan Peken, Nicholas Burns, an tout ijans madi swa, e Minis Afè Etranjè a Xie Feng te eksprime pwotestasyon gouvènman li a kont vizit Pelosi nan rejyon an. Li ajoute ke Lachin pa p rete "bra kwaze" devan vizit sa a.