Prezidan Joe Biden tanmen premye diskou li sou Eta Peyi a (State of the Union) Madi swa ak pawol sevè pou advèsè otokrat li yo ak ankourajman pou popilasyon Amerikèn nan ki soufri anba pandemi a, enflasyon epi divizyon politik.
Biden antre nan La Chanm dè Reprezantan - 2 chanm yo reyuni - anba bravo. Prèske pèson pat gen kach nen nan figi yo apre 2 zan pandemi a.
"Ane pase a, COVID te anpeche nou ansanm," Biden deklare. "Ane sa a, anfen nou ansanm anko."
Manm Kongrè a te vole ti dapo ble ak jon Ikrenyen e Biden pat pèdi tan pou'l adrese konfli kap eskalade ant La Risi ak Ikrèn. Li anonse li pral fèmen kounyela a espas ayeryen Ameriken pou tou vol Ris yo. Li e pale sou sa pandan 10 minit.
"Gen 6 jou desa, Vladimir Putin te eseye souke fondasyon mond lib la, li te konpran li te ka koube'l anba menas li yo," Biden deklare pandan Demokrat kou Repibliken tap bat bravo. "Sepandan li te fè yon move kalkil. Li te konprann li te ka woule Ikrèn e ke le mond tapral koube devan'l tou. Olye de sa, li fè fas ak yon miray fos li pat janm imajine. Li te fè fas ak pèp Ikrenyen an."
Pou souliyen pwen sa a, Oksana Markarova, anbasadè peyi Ikrèn Ozetazini te rejwenn premyè dam Jill Biden nan syèj espesyal li a e spektatè yo te kanpe pou bat bravo pou li. La Mezonblanch di premye dam nan te gen yon ti flè solèy bwode sou manch rad ble marinn ni an, ki se flè nasyonal Ikrèn.
COVID-19
Pandemi kowonaviris la epi ekonomi an te reprezante pwen santral diskou Biden nan. Anvan aswè a li te pwononse diskou devan sesyon konjwen KOngrè a, men sa sete premye diskou li sou Eta Peyi a.
Pa rapo ak pandemi a, li deklare "Gras ak pwogrè nou fè, gras ak reziyans nou ak zouti nou genyen, aswè a mwen ka di nap pouse pou pi devan an sekirite, nou komanse reprann woutin nou yo."
Sepandan kri Ikrèn nan kap evolye te jete yon lonbraj sou pi fo preparasyon diskou a, e Biden te oblije pwononse 3 diskou sou reyaksyon Etazini fas ak konfli a. Etazini ak alye LOTAN yo mete plizye seri sanksyon sevè kom pinisyon kont La Risi ak Putin pèsonèlman.
Nan semèn ki pase a, Biden pale de kriz Ikrèn nan kap ogmante plizyè fwa.
Pi gwo kritik pezidan an pa mete dlo nan bouch yo pou di sa yo panse. Ansyen Prezidan Donald Trump deklare Madi ke "pata dwe gen okenn lagè kounyea ann Ikrèn kounyea, e ke se yon bagay ki terib pou limanite ke Biden, LOTAN ak L'Oksidan echwe yon fason mizerab epi kite lagè a komanse.
Apre diskou Biden nan, Gouvènè eta Iowa a, Kim Reynolds te bay repons pati Repibliken an sou diskou a kote li kritike prezidan an pou apwoch li vizavi pandemi a, restriksyon COVID-19 yo, defisi bidjetè a ak enflasyon ki monte 17 wotè.
Korespondan VOA nan Lamezonblanch, Anita Powell ekri vesyon orijinal nouvel sa a