WASHINGTON —
Prezidan Joe Biden lanse apèl pou yo mennen pwosè pou krim lagè kont Prezidan Ris la, Vladimir Putin. Biden di li pral enpoze plis sanksyon kont La Risi apre nouvèl ki fè konnen gen atwosite ki komèt nan Ikrèn.
Biden deklare Lendi ke Putin se yon "kriminèl lagè". Prezidan an fè komantè sa a nan mikwo ak devan kamera jounalis yo apre Prezidan Ikrenyen an Volodymyr Zelenskyy t'al vizite Bucha, youn nan vil ki ozalantou Kyèv kote responsab Ikrenyen yo di yo jwenn kadav sivil.
Zelenskyy dekri zak La Risi komèt yo kòm "jenosid" e li lanse apèl bay peyi Oksidantal yo pou yo mete sanksyon pi sevè toujou kont Moskou.