Prezidan Joe Biden itilize madi pou la premyè fwa pouvwa pou l padone moun avèk yon anons kote li di li padone 3 moun -pami yo gen premye nwa ameriken ki te travay pou Sèvis Sekrè La Mezon Blanch la. Prezidan an anonse tou li chanje pèn 75 lòt moun, yon desizyon ki an favè sitou moun ki nan prizon lontan pou dwòg e ki pa t komèt vyolans. Biden pibliye yon deklarasyon kote l di:
“Lèzetazini se yon peyi lwa ki ofri moun yon 2èm chans, redanmsyon ak reyabilitasyon.” Li ajoute: “ Padon sa a se pou moun ki demontre angajman yo pou yo chanje, pou yo mennen yon pi bon vi, k ap fè efò chak jou pou yo bay sosyete a sa li te ba yo, e k ap pote kontribisyon yo nan kominote yo. “
Youn nan moun ki benefisye padon sa a se Abraham Bolden ki gen 86 zan. Se yon ansyen manm Sèvis Sekrè ameriken an. Li se premye moun nwa ki te vin manm ekip ki t ap pwoteje prezidan Lezetazini an. Li te antre nan sèvis la sou administrasyon Prezidan John F. Kennedy.