Lidè Etazini , Kanada ak Meksik ap fè chita tande Jedi pou premye rankont o some trilateral yo depi 5 an. Yo pral diskite sou kestyon ki gen enpòtans depi lontan pou peyi yo tankou pa egzanp chanjman klimatik, migrasyon, konpetisyon ekonomik epi defi COVID-19 la poze pou yo.
Premye Minis Kanadyen an, Justin Trudeau ak Prezidan Meksiken an, Andrés Manuel López Obrador, rankontre ak Prezidan Ameriken Joe Biden nan Lamezonblanch Jedi. Lidè yo kòmanse jounen an ak rankont bilateral ak Biden, anvan yo tout reyuni ansanm pou premye rankont o somè lidè Nò Ameriken yo depi ane 2016.
"Se rezilta 10 mwa travay pou bay platfòm Amerik di Nò a jarèt - ki se yon bagay esansyel pou sikse nou nan nivo nasyonal epitou antanke patneship ki ka jwe yon wòl kritik le nap eseye rezoud defi rejyonal ak global yo, " sekretè de près adjwen Lamezonblanch la Chris Meagher deklare Mekredi.
Sepandan, "2 amigos yo" jan kèk moun rele yo gen kèk kestyon difisil pou yo kouvri.
Apre li te monte sou pouvwa a, Biden te mete fen nan Pwotokòl Pwoteksyon Migran an - ke Prezidan Trump te mete ann aplikasyon e ke anpil moun konnen kòm pwogram "Rete Meksik" la. Sepandan eta Texas ak Missouri te asiyen gouvenmen federal la pou fe'l reprann politik sa a. Gen anpil chans pou sa fèt nan semèn kap vini yo.
"Santiman ki genyen Ozetazini se ke Meksik pa fè ase nan domen sekirite a, e mwen kwè se ka yon pwen tansyon ant 2 peyi yo," Ryan Berg, yon responsab Pwogram Amerik yo nan Sant Etid Estratejik ak Entènasyonal la di VOA. "Siman lidè yo pral diskite pwogram Rete Meksik la, le fèt ke Tit 42 a ann aplikasyon toujou, deplasman migratwa yo epi kijan Meksik kapab ede Etazini nan peyi Triyang Nò yo."
Politik ekonomik ak politik sou chanjman klimatik Washington yo kapab vekse Kanada. Trudeau fè konnen li gen entansyon bay Biden baryè sou pwogram "Achte Ameriken an" ke Ottawa konsidere kòm pwoteksyonis.
Twa peyi yo pral siman diskite sou kestyon ki depase frontyè yo tou, tankou pa egzanp manifestasyon kap fèt nan Kiba epi blokis ekonomik Etazini dirije kont zile a - ki se yon pwen dezakò ant Biden ak Lopez Obrador.
Genyen tou, kestyon eleksyon "maskarad" pou site pawòl Prezidan Biden, ki te re-mete Daniel Ortega sou pouvwa a nan Nikarawa. Epi zak li poze pou lage nan prizon epi komèt zak represyon brital pou li te ka ranpote yon 4èm manda kòm lidè peyi Amerik Santral sa a.