Pandan premye dimanch nan seri yo rele “dimanch anvan kanaval la” t ap dewoule nan plizyè vil nan peyi a, nan komin Kafou se gang yo ki te pran inisyativ la dimanch 19 janvye 2025 la.
Defile a te kòmanse devan Sant spòtif Kafou a, nan Wane 93, menm jan sa konn fèt lè se meri a k ap òganize festivite yo.
Enfòmasyon yo rapòte tou, sou cha ki t ap pote animasyon an, animatè yo tankou DJ a te gen zam sou yo. Alantou cha a te genyen tou yon trantèn bandi ak gwo zam ki te abiye toudenwa.
Te gen bandi ki te kanpe sou tout pakou a pou asire yo evenman an dewoule kòmsadwa.
Cha a te jwe kèk mereng kanaval, men tou kèk mizik ki chante lwanj kowalisyon gang Viv ansanm nan. Gen moun nan komin nan ki pa t ezite fè pakou a ak gang yo.
Se pou premye fwa, devan je tout moun, gang yo te fè dimanch « pré-carnavalesque » nan Kafou.