« Pwogram sa a reponn ak bezwen esansyèl fanmi ki pi vilnerab yo, ankouraje relansman ekonomik epi ranfòse fratènite nan mitan popilasyon an », se sa k ekri nan kominike sa a ki pibliye sou kont X Laprimati @PrimatureHT.
Daprè sa ki di nan kominike sila a, nouvo pwogram sa a gen 4 objektif ki se : asistans pou fanmi ki nan sitiyasyon difisil yo, Netwayaj ak enfrastrikti vil yo, Ranfòsman sekirite ak lojistik, Soutni sektè enèji ak agrikilti.
Pou reponn ak objektif sa yo, otorite yo fè konnen yo pral poze kèk aksyon tankou distribiye kit alimantè ak fè transfè lajan bay fanmi ki pi afekte yo, granmoun, moun ki « andikape » ak fanm ki chèf fanmi yo.
Yo pral mete sou pye tou kantin mobil ak restoran kominotè nan plizyè lokalite, lanse yon pwogram netwayaj, reyabilite wout estratejik yo, mete sou pye dispozitif pou lame a ak lapolis pou pwoteje zòn estratejik yo, pèmèt EDH ogmante pwodiksyon ak distribisyon kouran elektrik la epi sipòte asosyasyon nan zòn andeyò yo ak inisyativ agrikòl yo.