Pou 10èm jounen chanpyona Lafrans lan, Melchie Dumornay, t ap vizite ansyen ekip li Stade de Reims, kote l te kòmanse karyè li an Ewòp.
Pou siyen retou li nan Estad auguste-delaune II, Grenadyè a fè yon dekabès pou ede Lyon bat Remwaz (3-0) epi kontinye pakou san fot li a nan D1 Arkema a.
Bitez ayisyèn nan te ouvri eskò a nan 13e minit match la apre yon frap Lindsey Horan ki te kontre. Corventina pwofite de rebon an epi foure boul la nan kan an ak yon deviyasyon pye dwat pou twonpe gadyèn Stade de Reims lan.
Nan fen match la, jeni ayisyen fè 3èm gòl match la apre yon sant Diani nan sifas la. Dumornay amòti balon an epi fè yon chout pye dwat pou voye boul la al benyen nan filè a.
Yon bèl dekabès pou Melchie Dumornay ki gentan fè 8 gòl nan chanpyona Lafrans lan pandan kòmansman sezon an.
Grenadyè a ki nomine pou pri FIFA The best nan kategori pi non 11, ap retounen sou teren ak ekip Lyon an demen madi a pou 5e jounen lig chanpyon yo.
Lyon ap vizite ekip Galatasaray la nan Istanbul.
N ap fè sonje, Melchie Dumornay gen 2 gòl nan 4 match nan lig chanpyon yo sezon sa.