« Lè w gen yon polis nasyonal ki gangrennen ak koripsyon ; ou gen yon bann moun pèp ayisyen an ap peye ak lajan taks li men ki prefere fè jwèt teworis yo epi makonnen kò yo ak bandi trè souvan kont popilasyon an, kidonk popilasyon an vin rann li kont li pa ka fè diferans ant yon bandi ak yon polisye.
Li konprann li lage pou kont li, donk li defann tèt li jan l kapab », deklarasyon Michel Soukar ki t ap bay opinyon l sou mouvman Bwa Kale kòm fòm rezistans popilasyon ayisyèn nan devlope kont ensekirite a ki pa janm sispann feraye nan peyi a.
Michel Soukar te nyanse pou l te di gen polisye ki gen volonte pou kwape zak bandi yo men yo pa jwenn soutyen eta majò yo.
« Polisye sa yo di w lè y adrese yo ak eta majò yo, yo pa jwenn okenn repons.
Lè y al chèche konprann pouki yo pa jwenn repons, yo dekouvri pwòp dirijan yo mare sosis yo ak gang yo.
Lè bandi yo byen ranseye se paske enfòmatè yo chita anndan vant lapolis la », eksplikasyon Michel Soukar ki te raple tout bèt jennen mòde, lè lavi w menase ou defann ou ak sa w genyen.
Li te kontinye pou l di « aprè batay la n a triye ant blese yo ak mò yo, men popilasyon an pa gen chwa ».