"Asanble plenyè a apwouve pwojè lwa a, nou tout kontan," se sa Prezidan Sena a, Efraín Cepeda, manm pati konsèvatè a, te di apre vòt la.
Pou lwa a antre an aplikasyon, li dwe pibliye pa Prezidan lagòch la, Gustavo Petro, ki lè li te nan Palman, te refize yon inisyativ menm jan an.
"Kongrè a pran yon mezi enpòtan anpil pou pwoteje tifi ak jèn fi yo (...) li pap posib ankò pou marye ak minè," se sa Diana Moreno, pòtpawòl ONG Profamilia, te deklare bay AFP.
Kolonbi pèmèt aktyèlman maryaj depi laj 14 lane, avèk konsantman paran moun ki minè a.
Nan rès Amerik di Sid, laj minimòm pou marye se ant 16 ak 18 lane. Ajantin pèmèt maryaj depi 14 lane ak apwobasyon yon jij.
Dapre chif ofisyèl yo, 114 maryaj ki enplike minè te selebre nan Kolonbi nan ane 2023.
Nan pifò ka sa yo, maryaj sa yo fèt nan kominote pòv, ant yon gason pi gran ak yon fi minè, sa ki kontinye "sèk oswa pyèj povrete", "abandon edikasyon" e ki limite "otonomi ak endepandans" fanm yo, dapre yon rapò Unicef.
" Se vrèman enpresyonan sena Repiblik la ki vote (lwa a) apre 9 tantativ depi 2007," se sa Sandra Ramirez, avoka ONG Equality Now, ki te ankouraje pwosesis lejislatif la, te eksprime.
"Aspè ki pi enkyetan an se aplikasyon lwa a nan mitan tifi ak jèn fi endijèn ak ki soti nan ras Afriken nan kominote riral yo. Se la travay la ap kòmanse," se sa Madan Ramirez te souliye.