Foutbol

Foutbòl: Grenadyè yo Fè 3 Gòl nan 10 Minit pou Mete Do Lachin Atè

WWCup England Haiti Soccer

Gras a gòl Melchie Dumornay, Nérilia Mondésir ak Batcheba Louis, Ayiti kale (3-2), samdi, Lachin nan yon match difisil kote Grenadyè yo t ap kouri dèyè eskò a.

Ekip lachin lan fè preske tout match la ap mennen. Azyatik yo t ap mennen (2-0) jiska 82è minit nan match foutbòl la.

Sepandan, medam Ayiti pa t janm abandone. Yo kontinye atake jiskaske yo vire van an sou Lachin.

Grenadyè yo fè 3 gòl nan 10 minit pou mete do ekip Lachin nan atè (3-2) epi siyen yon dezyèm viktwa nan Pink ladies week la ki ap dewoule nan peyi Tiki.

Melchie Dumornay fè premye gòl la sou penalite (83è). Twa minit apre, Balondò Concacaf la ta pral pwovoke yon lòt penalite. Fwa sa se Kapitèn nan, Nérilia Mondésir ki choute l epi egalize pou Ayiti.

SEE ALSO: Foutbòl : Melchie Dumornay Ranpòte pri pi Bon Jwez nan Rejyon Concacaf la

Atakant FC Fleury a, Batcheba Louis, ta pral konplete remontada a nan 90è minit.

Yon bèl viktwa pou Grenadyè ki montre fòs mantal ak detèminasyon ekip Ayiti a.

Medam yo fè 7 gòl nan 2 match nan Pink Ladies Week la.

Medam yo ap retounen sou teren ankò madi 29 novanm pou jwe kont ekrip Larisi a. Match sa ap kòmanse a 6è nan maten.