Bank Entè-Ameriken Devlopman an - BID oganize jodia nan Washington yon konferans sou Devlopman Ekonomik an Ayiti a travè sektè prive a.
Pandan konferans la ki dewoule maten an nan katye jeneral BID la, patisipan yo te diskite sou plan bank la ak oganizasyon entènasyonal genyen pou apiye devlopman ekonomik Ayiti nan moman lap eseye soti nan kriz ensekirite a.
Evenman an konsantre tou, dapre sa La BID di, sou kijan peyi nan Emisfè Oksidantal la ka ede Ayiti bay devlopman ekonomik la jarèt atravè komès ak mobilizasyon resous li yo.
BID fè konnen pandan 5 an ki sot pase yo, rad Ayiti ekspote Ozetazini te reprezante twa-ka total pwodui Ayiti ekspote yo epi 5% pwodui nasyonal bru li.
Endistri rad la anplwaye apepre 60 mil moun, ki se yon 5èm sektè ofisyèl travayè Ayiti.
Ant ane 2006 ak 2023 ekspotasyon rad ant Ayiti ak Etazini te ogmante pa 64%, tandiske Envestisman Etranje Dirèk te ogmante plis pase 4 fwa valè ekspotasyon an. Sa te lakoz tou plis pase 16,000 nouvo djob te vin kreye.
Pami responsab kap patisipe nan rankont BID la, gen ansyen palmantè Ameriken Christopher Dodd, ki se konseye espesyal prezidan Biden pou Amerik yo, Alexia Latortue, Sekretè d Eta Adjwen Ameriken pou Komès Entènasyonal ak Devlopman, epi depite Demokrat Florid, Sheila Cherfilus-McCormick.