Michael Cohen, ki te konn repare erè Donald Trump, avwe ayè jedi a ke nan ane ki pase yo li te konn bay manti youn apre lòt, kote li di yon jiri nan pwosè kriminèl nan New York kont ansyen prezidan an ke kèk fwa li te konn bay manti pou ede Trump e kèk lòt fwa pou pwoteje fanmi li.
Avoka defans Trump, Todd Blanche, te benyen Cohen ak kesyon pou chache prezante temwen vedèt la kòm yon moun ke yo paka kwè, ke li sitou pa onèt, renmen twonpe moun, e toujou gen bagay li ap kache.
Nan yon okazyon, Cohen te sonje yon manti ke li te bay yon panèl nan kongrè a sou ki kantite fwa li te pale ak Trump sou yon pwojè konstriksyon yon bilding Trump Tower nan Moskou, ki pa te janm rive fèt.
Cohen di ke manti sa yo sete pou ede Trump nan moman an, men Blanche te mande-l: “Ou te konnen ou t ap bay manti lè sa a? » Cohen reponn « Wi ».
Nan yon lòt okazyon, Cohen di li te bay yon jij manti sou taks, e li di sete pou jij la pa te akize madanm li Laura.