Otorite sante palestinyen yo di ke atak aeryen Izraelyen sou vil Rafah nan sid Gaza touye omwen 22 moun, pami yo 6 fanm ak 5 timoun.
Youn nan timoun ki mouri nan frap yo te gen sèlman 5 jou depi li te fèt. Izrayèl lanse atak aeryen regilyèman sou Rafah depi kòmansman lagè a e li menase pou l voye twoup atè nan vil la. Li di Rafah se dènye kote ki anba kontwol Hamas nan Gaza.
Plis pase yon milyon Palestinyen te chèche refij nan vil sa ki gen fwontyè ak peyi Ejip.
Etazini ak lòt peyi ekzòte Izrayèl pou pa anvayi vil la paske yo pè pou pa gen yon katastwòf imanitè. Sekretè Deta Ameriken Antony Blinken kòmanse lendi setyèm misyon diplomatik li nan Mwayenn Oryan an depi lagè Izrayèl ak Hamas la te tanmen nan mwa Oktòb.