Yon influencer ki popilè anpil sou TikTok jwenn arestasyon li nan vil Dubai, Emira Arab Uni, akoz yon videyo satirik li pibliye kote li montre Emirati (setadi yon gwo boujwa) ki dispoze depanse yon pakèt lajan sou machin liksye nan yon magazen otomobil.
Nan videyo a, gwo chabrak la voye pakè lajan bay anplwaye - ki sezi kou pwatann - epi li pase nan betiz moun rich nan vil sa a, ki gen renome pou bilding men wotè li yo ki atire anpil touris.
Otorite yo akize misye dèske li pibliye "pwopagann" ki "andomaje enterè piblik la epi "pase nan tenten" sitwayen Emira Arab Ini.
Dubai se youn nan peyi Arab nan Mwayèn Oryan an ki pi liberal o pwen d vu sosyal. Li pa enpoze restriksyon sevè sou rad moun gen dwa mete, ni sou bar yo ak teyat yo.
Sepandan, yon lwa ki gen pawol vag ladann, entèdi okenn pawòl ke otorite yo konsidere kòm ensiltan pou Emira Arab Ini, ki se yon kominote ki gen ladann divès wayom prens Arab yo kontwole - pami yo Dubai.