Avoka gouvènman federal ameriken anonse lendi akizasyon kont yon Israelyen-Ameriken, kote yo di li te aji kòm ajan etranje ki pa anrejistre e ki t ap travay nan enterè LaChin e te chache negosye lavant zam ak petwòl ki t ap soti nan peyi Iran.
Otorite yo akize Gal Luft komkwa li te anplwaye epi peye yon ansyen otorite gouvènman ameriken ki te travay kòm konseye pou Donald Trump lè li te prezidan, e komkwa li te chache fè otorite a sipote politik anfavè LaChin.
Avoka gouvènman yo di Luft te ranje rankont ant otorite iranyen ak yon konpayi enèji chinwa pou pale sou antant ki enplike pwogram petwòl Iran ki te anba sanksyon.
Luft te travay kòm youn nan direktè yon biwo analiz ameriken ki santre sou enèji, sekirite ak tandans ekonomik. Li te jwenn arestasyon l nan zile Chip an Fevriye anba akizasyon ke Etazini te mete sou do l. Li te sove apre yo te lage l sou kosyon e jouk kounyea li deyò a toujou.