Sekretè Trezò Ameriken Janet Yellen ale Peken Mèkredi 5 jiyè pou yon reyinyon ak gwo otorite Chinwa sou yon pakèt sijè, pami yo enkyetid Etazini sou yon nouvo lwa Chinwa pou kontrekare espyonaj, dapre sa yon gwo otorite nan depatman Trezò di.
Vwayaj Yellen nan Lachin nan se yon bagay ke li te planifye depi lontan nan kad efò Prezidan Joe Biden pou asire ke gen kominikasyon pi pwofon ant 2 pi gwo ekonomi yo nan mond lan, cheche estabilize relasyon yo epi bat pou evite erè lè gen dezakò ant 2 peyi yo.
Vizit sa fèt sèlman kèk semèn apre Sekretè Deta Antony Blinken te vizite Peken kote li te antann ak Prezidan Chinwa Xi Jinping pou estabilize relasyon yo epi asire ke gwo rivalite ant 2 peyi yo pa debouche sou konfli.
Yellen planifye pou di nouvo ekip ekonomik Lachin nan ke Washington pral kontinye defann dwa moun ak pwòp enterè sekirite nasyonal li nan kèk aksyon kont Lachin, men ke li vle travay ak Peken sou defi ijan tankou chanjman klima, ak pakèt dèt ki fè anpil peyi ap soufri.