Yon gwo delè anpil moun te krenn nan revizyon aplikasyon pou paspò Ameriken lakoz anpil moun oblije ranvwaye plan yo te genyen pou vwayaje nan peyi etranje pandan sezon ete a.
Vè zòn mwad Mas la, moun ki tap aplike pou swa renouvle swa pou nouvo paspò te konprann yo gen ase tan pou resevwa dokiman an anvan yo monte nan avyon pou al nan peyi etranje pandan sezon ete a.
Sepandan, Depatman D Eta di li tèlman resevwa yon pakèt aplikasyon li nan yon sityasyon kote li inonde kounyea, nan moman kote li gen yon reduksyon nan anplwaye li yo apre pandemi a.
Gen 500,000 moun ki soumèt aplikasyon pou paspò nan yon sèl semèn. Ane pase a, Depatman d Eta di li te remèt 22 milyon paspò.
Sa vinn kreye yon sityasyon kote espwa kèk Ameriken te genyen pou vwayaje ak fanmi yo gache nèt, malgre pakèt lajan yo depanse. Moun sa yo fè lake, telefòn an men, yo depanse yon lajan siplemantè pou gen paspò yo pi vit e yo fè konnen jan yo vekse ak lantè pwosesis la nan komantè yo kite sou entènèt.