Depatman Justis Etazini akize lapolis vil Minneapolis Vandredi dèske li vyole sistematikman dwa konstitusyonèl epi diskrimine kont Nwa yo ak Endyen Ameriken yo. Akizasyon sa a vini apre yon ankèt sou Depatman polis la ke yo te lanse apre lanmò Nwa Ameriken George Floyd.
Minis Jistis Merrick Garland anonse rezilta yo Vandredi.
"Nou jwenn ke MPD ak vil Minneapolis sevi tout tan ak lafos, diskrimine kont nwa yo ak Endyen Ameriken yo nan aktivite yap mennen pou ranfose lwa peyi a - ki se yon bagay ilegal - epi vyole dwa moun kap patisipe nan aktivite ki pwoteje pa lwa ki jere libete la pawol. Nou jwenn tou ke yo diskrimine kont moun ki gen pwoblem mantal ki afekte konpotman yo e yo pa trete yo komsadwa le yo fe fas ak yon sityasyon kriz."
Foto Achiv: Damarra Atkins rann omaj a George Floyd devan yon miraj yo penn nan lone li sou plas George Floyd nan Minneapolis, 23 Avril 2021.
Anket dwa sivik la, ki dire 2 zan, te jwenn ke se pwoblem sistematik nan Fos Polis Minneapolis la ki te lakoz sak te pase George Floyd.
Nap raple ke Floyd mouri toufe apre polisye ki te arete l te ajenou sou kou li.
"Fom bay MPD ak lide vil yo kredi pou chanjman enpotan yo mete an plas. Pami yo nou jwenn entediksyon kont tout metod kontwol ki gen pou we ak kou yon moun epi entediksyon manda dare ki mande pou bat pot selman epi antre fouye. Men, jan rapo a souliyen gen anpil travay ki rete pou fet. Depatman Jistis la rekomande 28 mezi ki va tabli yon kad pou amelyore sekirite piblik la, ogmante konfyans kominote a epi respekte Konstitisyon an ak lwa federal yo."Garland di Vil Minneapolis ak depatman polis la siyen yon antant ke moun konnen kom dekre konsantman federal, ki mande pou moun ranpli fomile ke yon otorite endepandan va jere epi yon jij federal va apwouve.
Aranjman an tet koupe ak refom kap fet nan vil Seattle, Nouvel Orleyan, Baltimore, epi Ferguson, Missouri.
Enfomasyon pou repotaj sa a soti nan Associated Press