Seleksyon manm juri a pou pwosè atis Ayisyen Pras Michel ki te konn chante ak gwoup Fugees la tanmen Lendi nan yon tribinal federal nan Washington.
Lajistis Etazini akize Prakazrel Michel, 50 an, dèske li pat enskri'l ak leta kom ajan Lachin, ke li te patisipe nan kraponnaj temwen epi patisipe nan yon konplo ak yon gwo chabrak Malezyen.
Michel ensiste li inosan.
Dapre rapò ki paret nan laprès, se relasyon atis la te genyen ak milyadè Malezyen Low Taek Jho alyas Jho Low, ki deklanche yon ankèt epi debouche sou akizasyon federal ki taka lakoz li pran ant 5 ak 20 an prizon pou chak chef akizasyon.
Dokiman lajistis di Malezyen an te peye ko-konspiratè li yo - pami yo Pras Michel, plizyè milyon dola pou eseye pran tèt administrasyon Trump la ak Depatman Jistis la anba Trump, pou kite tonbe anket li tap mennen sou Low, epi fè aranjman pou depote yon biznisman Chinwa ki te konn kritike Lachin pandan li tap viv Ozetazini. Yo akize Michel tou deske limenm ansanm ak Low te komet blanchiman lajan pou kache kontribisyon lajan etranje nan kanpay yon politisyen Ameriken.
Lwa peyi Etazini di se yon krim pou yon etranje kontribye lajan nan kanpay nan nivo federal, eta oubyen eleksyon lokal.
Depatman Jistis la di akize yo te kache le fèt ke yo te resevwa lajan e ke yo tap travay pou Low ak yon minis Chinwa.
Milyadè Low te gen tan chape poul li kouri kite Etazini apre lajistis te akize li ofisyèlman. Otorite yo kwè misye ap viv nan Lachin kounyea.
VOA Kreyòl te eseye pran kontak ak Pras Michel pa rapò ak ka sila a men reprezantan li te fè nou konnen Michel vle tann dewoulman pwosè a anvan li pale.
Kek enfomasyon pou repotaj sa a soti nan ajans nouvel Reuters