Vis Prezidan Etazini an, Kamala Harris, kritike mèkredi politik etranjè Lachin pandan li t ap pwononse yon diskou andeyò Tokyo. Harris deklare konpòtman agresif Peken menase lòd entènasyonal la ki baze sou eta de dwa.
Harris fè deklarasyon sa a nan yon diskou li pwononse devan matlo ki abò bato de gè ameriken USS Howard, ki akoste nan Baz Naval Yokosuka. Se pi gwo enstalasyon naval Etazini genyen nan lemond. Vis Prezidan an di:
"Lachin minnen eleman kle lòd entènasyonal la. Lachin defye libète deplasman sou lanmè. Lachin sèvi ak puisans militè ak eknomik li pou l lolo epi kraponnen vwazen li yo. E nou wè ak je nou konpòtman li ki bay gwo kè sote nan Lanmè Oryantal Lachin nan ak nan Lanmè Sid Lachin nan. Sa pa gen lontan, li te pwovoke bato ki t ap navige nan Detwa Taywann nan."
Vis Prezidan Kamala Harris pale ak lapres nan Baz Naval Yokosuka tou pre Tokyo, Japon, Mekredi 28 Sept. 2022.
Harris ajoute Etazini kwè lapè ak stabilite nan Detwa Taywann nan esansyèl pou ka gen yon Endo-Pasifik lib e ouvè. Dapre li toujou, "avyon Etazini pral kontinye vole, bato li pral kontinye navige e opere tèt frèt nenpòt ki lè e nenpòt ki jan lwa entènasyonal pèmèt nou fè sa."
Harris ap pran avyon jedi pou l ale Sewoul, kote li pral vizite zòn demilitarize ki separe Kore di Nò ak Kore di Sid.
Pandan sejou V. P. an nan Sewoul, li va rankontre Prezidan Sid Koreyen an, Yoon Suk Yeol, ki se yon konsèvatè. Yoon ap travay pou ogmante alyans peyi li ak Etazini e li apiye lide pou 2 peyi yo fè plis egzèsis militè ansanm.
Kore di Nò lanse yon kantite rekò misil ane sa a -pami yo gen yon misil balistik kout pòte li te lanse dimanch pase, yon ti tan anvan kòmansman vizit Harris la nan Japon.