Frances Tiafoe mete fen lendi nan seri 22 match afile Rafael Nadal te ranpòte san okenn defèt nan tounwa gran chelèm yo: Tiafoe bat Nadal, ki ranpòte 22 tit chanpyon, sou yon skò 6-4, 4-6, 6-4, 6-3 nan 4èm round US Open nan.
Tiafoe se moun eta ameriken Maryland; li gen 24 tran e li se No. 22 nan klasman jwè tennis k ap patisipe nan tounwa Flushing Meadows la; se 2èm fwa li rive atenn faz ka de final yon tounwa gran chelèm nan karyè li.
Se pi jenn gason ameriken ki rive lwen konsa nan US Open nan depi Andy Roddick te reyalize eksplwa sa a an 2006; sepandan foul la pa t panche yon bò pou l te bat bravo pou yon sèl jwè. Nan domèn tenis la, Nadal se yon jwè ki popilè onnpepli e li te jwenn anpil sipò nan Stad Arthur Ashe la pandan volim aplodisman yo tap monte jiskaske tèt stad la, ki kapab ouvè, te femen pandan 4èm set la.
Tiafoe, ki pral fe fas ak tèt de seri No. 9 la, Andrey Rublev, deklare:
“M pa menm konnnen kisa pou m di la a. Se pa ti kontan m kontan. Mwen pa ka kwè sa. Misye se youn nan pi gran jwè tenis nan tout istwa jwèt la. Mwen jwe yon tenis enkwayab jodi a; men m pa menm konnen sa k rive la a.”