Depatman Sekirite Nasyonal Etazini òganize yon konferans pou laprès nan Miami Mèkredi pou anonse mezi yap pran pou kwape trafik zam kap fèt an Etazini ak Ayiti.
Anthony Salisbury se Ajan Espesyal ki responsab pou Envestigation Depatman Sekirite Nasyonal nan Miami, HSI.
"HSI ak kolèg nou yo konstate yon gwo ogmantasyon nan trafik zam ilegal ant Etazini ak Ayiti. Non sèlman gen ogmantasyon nan kantite zam nou konstate men kalib zam sa yo. Zam nou wè la yo se zam ke nou entèsepte ki te destine pou Ayiti. Pami yo gen zam sniper 50 kalib, epi mitrayèt."
Your browser doesn’t support HTML5
Etazini Anonse Nouvo Mezi pou Kwape Trafik Zam ann Ayiti
Dapre Ajan Salisbury zam sa yo gen kapasite pou yo koze anpil dega.
"HSI ak kolèg nou yo nan Depatman Sekirite Nasyonal, ATF, Lapolis Miami Dade ak Minis Jistis Etazini oganize konferans sa a jodia pou fè tout moun konnen nap swiv kestyon sa a de pre. Nap ogmante jefò nou pou kwape trafik ilegal zam nan Karayib la ak Ayiti. "
Vernon T. Foret, direktè operasyon Sèvis La Dwan ak Pwoteksyon Fwontyè Etazini pou rejyon Miami ak Tampa, Florid. Bay detay de kijan otorite Ameriken yo gen entansyon kwape trafik zam nan.
"Nou fikse kom priyorite, enspekte tout kago ki destine pou Ayiti. Nap enspekte koli moun ekspedye pa liy ayeryèn komèsyal yo tou. Donk ansanm ak patnè nou yo nap sèvi ak tout zouti nou genyen a la dispozisyon nou pou idantifye e sezi zam, pyès pou zam ak minisyon a destinasyon Karayib la - e akoz ogmantasyon nou konstate a Ayiti an patikilye."Zam fann fwa sa a se youn pami fizi Depatman Sekirite Nasyonal Etazini sezi nan yon kagezon ki te destine pou Ayiti.
Nouvèl sa a vini apre plizyè semèn batay ant gang yo nan Potoprens ki lakoz de milye moun oblije kouri kite kay yo de de santèn lòt blese.
Pandanstan, peyi tankou Bahamas ak Jamayik rapòte yo ogmantasyon nan zak vyolans ki fèt ak zam lakay yo.
Jounalis VOA Espayòl Antoni Belchi nan Miami kontribye a repotaj sa a