Yon ti kras plis ke mwatye elektè repibliken Ozetazini ki ka vote nan eleksyon primè pou prezidansyèl la, di yo ta pi renmen wè yon lòt moun poze kandidati yo pou pati a olye de Donald Trump, daprè rezilta yon sondaj The New York Times ak Siena College pibliye.
Apre sondaj la te fin idantifye votan repibliken ki plis dispoze pou yo vote nan primè yo, li te mete devan moun ki reponn kesyon yo yon chwa ant Donald Trump ak 5 lòt kandida potansyèl pou nominasyon an. Se sèlman 49% nan elektè yo ki chwazii Trump, menmsi ansyen prezidan an te ranpòte 94% vòt repibliken yo nan eleksyon 2020 an, yon eleksyon li te pèdi devan kandida demokrat la, Joe Biden.
Advèsè ki vini imedyatman apre Trump nan chwa elektè repibliken yo, se Gouvènè Florid la, Ron DeSantis, ke 25% votan chwazi. Pami lòt kandida potansyèl yo gen Senatè Tekzas la, Ted Cruz (7%); ansyen Vis Prezidan Mike Pence (6%), ansyen gouvènè Eta Kawolin di Sid e ansyen anbasadè nan Nasyonzini sou Trump, Nikki Haley (6%), epi ansyen Sekretè Deta Mike Pompeo (2%).