BRIKSÈL - Nan yon rankont Minis Afè Etranjè Inyon Ewòp la fè nan Luxembourg nan jounen lendi a, yo abòde mwayen pou yo debloke plizyè milyon tòn sereyal ki bloke nan Ikrèn akoz Larisi bloke pò ki bay sou Lanmè Nwa a.
Ikrèn se youn nan pi gwo ekspòtatè ble nan lemond; sepandan ekspòtasyon sereyal li bloke e plis pase 20 milyon tòn ble ak mayi rete nan silo depi Larisi te envayi peyi a epi li bloke pò l yo.
Moskou rejte tout responsablite pou kriz alimantè sitiyasyon sa a pwovoke; dayè li lonje dwèt li sou peyi oksidantal yo pou mank manje sa a ki pwovoke yon gwo ogmantasyon pri ble ka mayi sou mache entènasyonal la, tandiske Òganizasyon Nasyonzini lanse avètisman pou di pral gen gwo grangou nan peyi pòv yo ki konte anpil sou enpòtasyon sereyal.
Inyon Ewòp la apiye efò LONU ap fè pou l patwone yon akò ki ta pèmèt ekspòtasyon rekòmanse depi pò ikrenyen yo; kondisyon an se pou ekspòtasyon manje ak angrè ris kapab rekòmanse tou; men sa ta mande pou Moskou bay otorizasyon li.