Lèzetazini lanse, dimanch 17 avril la depi Eta Kalifòni, yon satelit ransèyman pou Biwo Rekonesans Nasyonal Ameriken an. Satelit la, mak NROL-85, te dekole a 6:13 a.m., lè lokal, depi Baz Ayeryèn Vandenberg la abò yon fize Space-X Falcon 9 ki gen 2 etaj.
Nan yon deklarasyon Baz Vandenberg pibliye, li fè konnen se premye misyon kote yo re-itilize pwopilsè fize SpaceX la.
Premye fwa Falcon te dekole, li te retounen sou latè e l te ateri sou pati baz la li lonje kòt la, yon zon ki sitiye o nòdwès Los Angeles. Pou Biwo Rekonesans Nasyonal Ameriken an dekri satelit NROL-85 la, li di aparèy la jwe “yon wòl esansyèl nan sekirite nasyonal nou.”
Lansman sa a se youn pami 3 ke Avyasyon Militè Lèzetazini te ofri SpaceX an 2019 pou yon pri konbine 297 milyon dola. NRO se ajans gouvènman an ki responsab devlopman, konstriksyon, lansman ak antretyen satelit ameriken ki prepare enfòmasyon sekrè pou prensipal otorite politik yo, pou kominote sèvis sekrè a e pou Depatman Defans ameriken an.