Manm yon jiri nan Eta Jòji, nan pati sid Etazini, jwenn 3 blan koupab pou asasina yon jèn nwa ki t ap fè djoging nan yon katye kote majorite rezidan yo se blan.
Pwosè a, ki divize kominote yo nan sid peyi a, fòse ameriken fè fas, yon lòt fwa ankò, ak konsekans yon ensidan kote blan touye yon manm yon minorite pou rezon rasis.
La jistis te lage sou do Gregory McMichael, 65 an, yon pitit gason li, Travis McMichael, 35 an, ak yon vwazen yo, William "Roddie" Bryan, 52 zan, akizasyon deske yo te kouri dèyè Ahmaud Arbery tou pre vil Brunswick an 2020 epi yo te touye li.
Pandan dewoulman pwosè a, ki te dire lontan, jiri a te tande agiman depaman ministe piblik la, avoka akizasyon an ak avoka defans la sou sa k te pase jou sa a.
An plis akizasyon pou 'vwadfè grav', lajistis te repwoche 3 mesye yo le fèt ke yo te komèt tantativ kidnaping ak "krim rayisab" -2 krim lalwa federal kondane- akoz yo te vize Arbery paske tou senpleman li te yon moun nwa.
Travis McMichael se sèl akize ki te fè depozisyon li devan tribinal la. Li deklare li te rale fizi l epi l te tire pandan li te kanpe tou pre Ahmaud Arbery; li te fè sa pou l te defann tèt li.
Tout akize yo te plede non koupab; yo fè konnen yo te sispek Arbery, ki t ap kouri nan katye yo, t ap chache kase yon kay nan katye a majorite blan an; e se poutèt sa yo te ale dèyè li ak machin yo. Kèk videyo akize William Bryan te filme sou telefòn montre Travis McMichael ki t ap konfwonte Arbery avèk zam li nan men l. 2 mesye yo te goumen anvan Ahmaud Arbery te eseye pran zam nan; epi papa a ak pitiit la te tire l 3 fwa.
Jiri a te gen 11 blan ak yon sèl nwa ladan l. Akize yo ap fè fas ak posibilite pou yo pase rès vi yo nan prizon san posibilite pou yo jwenn libète sou kosyon. Yon jij va deside ki pèn yo merite.
Se jounalis VOA News Chris Simkins ki ekri vesyon orijinal repotaj sa a ann Angle
Facebook Forum