Yon kolonèl retrete lame Kolonbi plede koupab nan yon tribinal Ameriken Jedi a akizasyon kòm kwa li te konplote epi apiye yon konplo pou touye Prezidan Jovenel Moise.
Moise te mouri asasinen nan chanm a kouche li sa gen 2 zan, nan yon asasina ki kreye yon kriz politik an Ayiti.
Dapre dokiman ki siyen nan tribinal Ozetazini, German Rivera ke moun konnen tou kòm Kolonèl Mike - te fè pati konvwa ki te pran direksyon rezidans Moise la nan Peleren 7 Jiyè 2021. Misye te fè sa kèk jou sèlman apre li te releye enfòmasyon ke plan an te chanje objektif e ke olye kidnape Moise yo tapral touye l.
Dokiman an di tou ke Rivera te dispoze sipò materyèl, fòmasyon ak moun pou apiye konplo pou kidnape ou asasinen Moise. Gen 3 chèf akizasyon yo lanse kont misye pa rapò ak akizasyon sa a.
Rivera se youn pami 11 akize ke la jistis Amerikèn fèmen nan prizon. Pami yo gen yon biznisman ke yo akize dèske li te ede yo obteni machin ak zam nan Florid.
Rivera plede koupab apre Rodolphe Jaar, yon sitwayen Ayiti ak Chili, ki te fè mèman parèyman nan mwad Jyen an e ke la jistis te kondane pou l pase rès vi li nan prizon. Misye admèt ke li te founi lajan ke yo te sèvi pou achte zam epi pou bay ajan sekirite prezidan an anba tab.
Odisyon sou santans Rivera a fikse pou 27 Oktòb nan tribinal federal Miami an.
