Minis Jistis pwovizwa ameriken an, Matthew Whitaker, deklare li panse pwosè pwokirè espesyal Robert Muller ap mennen sou entèferans Larisi nan eleksyon prezidansyel 2016 la pral fini anvan lontan. Objektif pwosè sa a se chache konnen si responsab kanpay elektoral Donald Trump la te mele nan yon konplo pou ede Larisi nan pwojè sa a. Minis Whitaker di:
“Daprè mwen, ankèt la preske rive nan fen li; e m espere nou va resevwa rapò Direktè Muller la pi vit posib."
Jiskaprezan ankèt pwokirè espesyal Muller la ateri sou konfesyon 34 moun oubyen konpayi fè pou yo swa rekonèt yo koupab nan afè a, swa soumèt yon demand dantant avèk lajistis. Madi 29 janvye 2019 la, sete tou pa Roger Stone, yon ansyen konseye nan kanpay elektoral Trump la, pou l te konparèt nan yon tribinal.
Roger Stone, ki gen 66 zan, te tonbe anba men otorite yo semèn pase a epi yo te akize l deske li te mele nan konplo an favè Larisi a. Li konparèt devan yon jij pou l tande majistra di li ofisyèlman ki akizasyon k ap peze sou do li:
Akizasyon dèske li te fè fo deklarasyon 5 fwa devan yon komisyon Kongrè a;
Akizasyon dèske li te eseye anpeche lajistis fè travay li;
Akizasyon dèske li te fè presyon sou temwen pou yo pa t fè depozisyon onèt nan afè a.
Misye Stone plede non-koupab pou tout chèf-dakizasyon sa yo.
Kontrèman avèk lòt moun otorite yo akize e arete nan kad ankèt sou entèferans Larisi nan eleksyon prezidansyèl 2016 la (yo tou te fèmen bouch yo apre arestasyon yo), Roger Stone, limenm, te pran yon veritab plezi pou l ap mache de televisyon an televizyon kote li deklare li inonsan; li pa t sispann di Pwokirè Muller, ki te pote akizasyon yo kont li, se yon ti piti ki pa konn sa l ap fè.
Lòt ansyen pwòch kolaboratè Prezidan Donald Trump ki mele nan pwosè a se:
George Papadopoulos, ansyen konseye politik etranjè;
Paul Manafort, ansyen diirektè kanpay elektoral;
Rick Gates, ansyen asistan-direktè kanpay elektoral
Micheal Flynn, ansyen konseye pou sekirite nasyonal;
Epi Michael Cohen, ansyen avoka pèsonèl Prezidan Trump.
Papadopulos fèk fin pije yon ti tou prizon;
Cohen kondane pou l pase 3 zan nan prizon –santans l ap kòmanse pije nan mwa mas la; tandiske Manafort, Gates avek Flynn ap tann pou yo konparèt nan tribinal pou yo konnen santans yo.
