NEW YORK —
Majistra Nouyòk la, Bill de Blasio fè konnen vil Nouyòk pral selebre ane 2022 a nan Times Square, jan li konn fè'l chak ane, malgre yon chif rekò enfeksyon COVID-19 nan vil la ak toupatou nan peyi Etazini.
De Blasio deklare nan yon entèvyou ak pwogram "Today" chèn televizyon NBC a ke li vle montre mond lan ke vil la "ap goumen pou'l jere kriz sa a."
Apre yo te entèdi moun vin selebre nouvo ane a sou plas Times Square ane pase a akoz pandemi a, responsab vil Nouyòk yo anonse plan pou yo redwi kantite moun ki ka fete e yo egzije pou tout moun vaksinen.
Pwochen majistra Nouyòk la, Eric Adams, pral prete sèman nan Times Square yon ti tan apre boul la desann pou make kòmansman ane 2022 a.
