JENÈV —
Oganizasyon Mondyal Sante (OMS) fè konnen atak lame ris la fè sou pèsonèl lasante ak enstalasyon medikal nan Ikrèn deranje efò k ap fèt pou pote bay popilasyon ki anba atak sa yo swen medikal ki ka sove lavi. L’ONU anrejistre 4 mil 450 sivil ki viktim -pami yo gen mil 900 mo ak 2 mil 560 blese- depi Larisi te lanse envazyon an 24 fevriye pase a.
Sepandan Biwo Wo Komisarya l’ONU pou Dwamoun –ki kenbe dosye sou moun ki viktim pandan lagè- fè konnen li kwè chif sa a pi ba anpil pase vrè kantite viktim yo.
Depi konfli a te kòmanse, OMS rapòte li fè livrezon 216 tòn pwovizyon ak ekipman medikal dijans atravè Ikrèn. Sepandan pòtpawòl òganizasyon an fè konnen se selman mwatye nan kagezon yo ki rive nan destinasyon yo.
