Sekretè Jeneral Nasyonzini, Antonio Guterres ap vizite Ayiti pou klere limyè sou kriz peyi a ap travèse, nan moman lap goumen pou jere zak vyolans gang yo.
Vizit Guterres la vini 9 mwa apre li te apiye yon demann gouvènman Ayisyen an te fè pou deplwaye yon "fòs entèvansyon" an Ayiti pou ede jere ensekirite a. Okenn fòs poko janm deplwaye e okenn peyi pa volontye pou dirije fòs la.
Guterres deklare sou kont ofisyèl Twitter li: "Mwen nan Potoprens pou pote solidarite mwen bay pèp Ayisyen an epi lanse apèl bay kominote entènasyonal la pou l kanpe ak Ayiti, epi deplwaye yon fos entènasyonal pou ede Polis Nasyonal Ayisyen an."
Li ajoute: "Se pa lè pou bliye Ayiti."
Guterres te di Konsèy Sekirite LONU an nan mwad Avril la ke li konsidere ensekirite a nan Potoprens "konparab ak sityasyon an nan peyi kote ki gen konfli ame" e li di Ayisyen ap fè fas ak kriz imanitè pi grav li janm konstate depi dè dizèn lane.
Nan mwad Septanm ane pase a, gang yo te rann sityasyon imanitè a pi grav apre yo te bloke tèminal petwol Varreux a pandan 6 semèn epi prèske bloke tout aktivite ekonomik peyi a. Konsèy Sekirite te enpoze sanksyon nan mwad Oktob pase a kont chèf gang pi puisan Ayisyen an, ke yo te akize dèske se limenm ki dirije blokaj la pou pwoteste kont desizyon gouvènman Ayisyen an pran pou l redui subvansyon petwol yo.
Etazini ak Kanada enpoze sanksyon tou kont politiksyen ak om dafè Ayisyen.
Tandiske gen anpil sipo pou plan Guterres prezante pou kreye yon fos entèvansyon pou Ayiti, e plizyè peyi eksprime enterè pou pou pote kontribisyon nan yon fos konsa, okenn peyi poko volontye pou l dirije yon deplwaman konsa, dapre sa diplomat yo di.
Peyi yo krenn apiye gouvènman Premye Minis Ariel Henry a ki pa eli, e ki di li paka oganize eleksyon nan peyi a akoz ensekirite a. Ayiti ap fonksyone san okenn reprezantan eli depi mwad Janvye a.
Henry te pran pouvwa a nan mwad Jiyè 2021, kèk jou apre asasina Prezidan Jovenel Moise, e li pwomèt pou l kite pouvwa a 7 Fevriye 2024. Men apre sa li ranvwaye oganizasyon eleksyon yo akoz tranblemanntè mwad Out 2021 an ki te lakoz 2,000 moun te mouri epi apre sa akoz zak vyolans gang yo.
