Komite Entenasyonal Sekou a, IRC fe konnen lap sispann pwovizwaman, operasyon lap mennen ann Ayiti akoz "ogmantasyon dramatik" zak vyolans gang yo ki lakoz ensekirite a vinn pi grav.
ONG a di aktivite gang yo nan katye popile yo menase operasyon asistans imanite li yo. Nan yon not pou lapres, IRC di aktivite gang yo, tankou pa egzanp barikad nan lari, anpeche asistans la rive nan enstalasyon li yo pou distribisyon.
Pami tip asistans IRC tap bay Ayisyen, nou jwenn swen medikal. ONG a di zak vyolans yo fose patne li yo pou yo sispann opere klinik mobil yo.
IRC lanse apel bay kominote entenasyonal la pou asire li jwen ase sipo pou li ka reponn bezwen imanite pep Ayisyen an, epi envesti nan entevansyon presi oganizasyon lokal yo oganize.
IRC te lanse operasyon li an Ayiti an 2022 nan Potoprens. Li fe konnen patne lokal ki travay ak li ap travay sou pwogram prevansyon ak repons pou zak vyolans ki vize fanm epi dispoze sipo psikolojik ak finansye pou ede fanm yo ak tifi reponn bezwen yo.
Sekrete Jeneral Nasyonzini, Antonio Guterres, remet yon rapo bay Konsey Sekirite LONU 15 Out, kote li re-itere bezwen ki egziste pou otorize yon fos miltinasyonal pou ede Ayiti jere zak vyolans gang yo ak ensekirite a. Peyi Kenya ofri pou dirije fos sa a.
