Chèg gang TiMakak touye e boule ex-Senatè Ayisyen Yvon Buissereth, ki te direktè jeneral EPPLS (Entreprise Publique de Promotion de Logements Sociaux). TiMakak se yon gwoup bandi kap opere nan zon katye Pelerin.
Nouvel la te parèt apre yon videyo te komanse sikile sou rezo sosyal yo ki montre plak machin ex-senatè a kap boule.
Buissereth te ak neve li, ki mouri ansanm avè'l Samdi. Yo tap vwayaje nan yon machin leta sou yon wout anpil moun konn pran pou evite Matissan kote gang yo ap batay.
Komisè Gouvènman Ayisyen an Jacques Lafontant konfime nouvèl la pou VOA Kreyol.
Premye Minis Ariel Henry kondane zak la ak tout fos li nan yon deklarasyon li pibliye dimanch.
"Asasen sa yo menm jan ak tout lot kriminèl kap simen dèy nan peyi a, nap pouswiv yo kote yo kache a epi trennen yo devan la jistis," deklarasyon Henry a di.
Premye minis la ankouraje Polis Nasyonal la pou'l ogmante jefo pou pou trake bandi yo.
Senatè Joseph Lambert te kritike bandi yo Samdi sou kont ofisyèl Twitter li.
"Yon zak asasinay revolta anplis ki kontinye met dlo nan je nou. Sena a, moun Sid peyi a ak tout kolèg yo konnen kijan'l te renmen Ayiti. Kondoleyans a tout fanmi ak zanmi'l yo. Sa paka rete konsa!" Senatè Lambert di nan Tweet li a.
Korespondan VOA Kreyol nan Potoprens, Matiado Vilme kontribye a repotaj sa a
