Manm gwoup G20 an yo, ki se 20 pi gran ekonomi mondyal yo, mete fen nan somè yo a mèkredi ak yon deklarasyon fèm ki kondane lagè Ikrèn nan e ak yon avètisman ke konfli a mete abse sou klou nan yon ekonomi mondyal ki te deja frajil.
Nan deklarasyon pou fèmen somè a, lidè mondyal yo degaje yo denonse lagè a malgre te gen divizyon nan mitan gwoup la, ki gen pa sèlman LaRisi men tou peyi tankou LaChin ak End ki gen bon jan relasyon komèsyal ak Moskou e ki pa vle kritike gè a. Pifò manm yo kondane ak fòs lagè Ikrèn nan.
Lè yo di pifò manm yo, sa moutre gen divizyon nan mitan yo, konsa kominike a rekonèt « te gen opinyon ki diferan ak evalyasyon ki diferan » e ke G20 se pa yon rankont pou rezoud kesyon sekirite. Kan menm kominike a mande pou Federasyon Ris la kite Ikrèn san kondisyon.
