Lidè Demokrat ak Repibliken nan Kongrè ameriken an rankontre mèkredi apremidi 9 janvye 2019 la avèk Prezidan Donald Trump, nan La Mezon Blanch, pou yo te chache yon solisyon pou fèmti gouvènman an ki antre nan 19èm jounen li. 2 pati yo bay rapò diferan sou sa k pase nan rankont sa a.
Prezidan Chanm Depite a, Nancy Pelosi (D-Kal), ak lidè minorite Demokrat la nan Sena a, Schuck Schumer (D-NY), ki pale avèk laprès aprè chita-tande a, fè konnen Prezidan an pati kite sal la apre 20 minit sèlman, paske Madam Pelosi te reponn “non” lè Misye Trump te mande: “Si nou ouvè gouvènman an, èske Demokrat yo dispoze finanse plan pwoteksyon fwontyè administrasyon an prepare a?” Senatè Schumer di:
“La a ankò nou ka wè Prezidan an genyen yon pwoblèm de “saute d’humeur”; li pa p bouje sou pozisyon li si li pa jwenn satisfaksyon total pou sa l ap egzije a.”
Kèk lidè Repibliken nan Kongrè a bay opinyon yo aprè dewoulman rankont ant Prezidan Trump ak lidè Demokrat yo:
“Depite Kevin McCarthy, lidè minorite a nan Chanm Bas la:
"Lidè Demokrat yo pa rapòte korèkteman sa ki pase nan reyinyon an. Prezidan te envite 2 lidè Demokrat yo pran lapwol. Li mande Nancy Pelosi: “Nancy, si nou ouvri gouvènman an, èske anvan lontan, èske nan 30 jou ou pral apiye finansman pou plan sekirite nou an, pou pwoteksyon fwontyè nou an?” Repons la, sete “NON”. Epi aprè Nancy Pelosi, sete tou pa lidè Demokrat la nan Sena a, Chuck Schumer, ki te leve vwa li pou l kriye opozisyon li kont pozisyon prezidan an."
Depite Steve Scalise, 2èm lidè minorite a nan Chanm Bas la:
"Madan Polosi di li pa p ofri pa menm yon dola pou rezoud pwoblèm nan; pa menm yon moso dola, alòske plizyè milye sitwayen ameriken ap soufri… alòske Demokrat yo pa ofri okenn kontre-pwopozisyon pou rezoud sitiyasyon an. Okenn nan lidè Demokrat yo pa ofri yon altènativ pou nou ouvèti gouvènman an. Ebyen, san pwoteksyon fwontyè a, nou pral wè ki kantite dwòg ki pral pase pou antre sou tèritwa nou an. Prezidan an ofri plizyè fwa pou l negosye an tout bòn fwa; Demokrat yo pa ofri menm yon kontre-pwopozisyon.”
Vis Prezidan Mike Pence te ajoute oubyen repete kèk presizyon sou jan rankont la te pase, daprè li:
"Gouvènman sa a pran tout dispozisyon pou li pwoteje pèp la. E jodi a ankò, nan “Situation Room” nan (salon kote otorite yo diskite sou gwo kriz yo), Prezidan an montre menm dispozisyon an. Non sèlman nou mande yon miray, men tou yon ogmantasyon nan kantite gad fwontyè yo ak plis resous pou yo fè travay yo. 60 mil moun afekte chak ane sou fwontyè a; e jodi a genyen manman-pitit ak timoun ki gen pwoblèm akoz yo ta travèse ilegalman fwontyè-sid nou an.
Genyen 800 san mil anplwaye federal ki nan pwoblèm akoz pozisyon jiskoboutis Demokrat yo. Gade pwopozisyon Prezidan an mete devan Kongrè a depi weekend nan, wa p wè li reflete pozisyon Demokrat yo tou. Li mande yo jodi a: “Si mwen ofri gouvènman an, èske n ap apiye plan sekirite gouvènman an? Repons: “non”. Alòs, Prezidan an pa wè yon rezon lojik pou l kontinye diskite avèk lidè Demokrat yo.”
“Prezidan an gen yon fèm konviksyon, sè ke li gen obligasyon pou l pwoteje pèp la. E yon pati nan pwoteksyon sa a konekte avèk sekirite sou fwontyè-sid nou an. Genyen lidè dwòg, lidè katèl kriminèl ki pwofite sitiyasyon sa a pou yo fè trafik moun. Preziidan an pati kite sal, paske, lè li mande Nancy Pelosi: “Si nou ba ou tout sa w ap mande a, èske w ap apiye finansman pou kontriksyon mi a? Repons la se “non”. Sa n ap fè la a, se sa menm pèp ameriken an ap mande nou. Men, lè nou mande lidè demokrat yo vini ak bon pwopozisyon sou tab negosyasyon an, yo reponn yo pa p negosye toutotan gouvènman an pa ouvri.
Pèp ameriken:
"Nou pwomèt nou sa. Prezidan sa a pral kanpe fèm jiskaske nou va gen resous ki nesesè pou nou rezoud kriz imanitè ki poze sou pati sid fwontyè nou an."
Minis Sekirite Enteryè a, Kirsjen M. Nielsen -ki te prezan nan rankont la e ki pale sou sitiyasyon an- te apiye deklarasyon Vis-Prezidan Mike Pence yo ak opinyon palmantè Repibliken yo.
