Vis Prezidan Etazini Kamala Harris rankontre Vandredi lide peyi Japon, Kore di Sid, Ostrali, Nouvel Zeland ak Kanada. Lide sa yo ap asiste yon fowòm rejyonal nan Bangkòk, Tayland kote yo te diskite sou denye lansman misil balistik Kore di Nò a.
Tout lide ki te prezan nan rankont la fe deklarasyon kote yo kondane lansman an epi lanse apel bay Kore di Nò pou'l sispann lanse misil.
Harris deklare: "Konpotman sa a bo kote Kore di No se yon vyolasyon plizye rezolisyon konsey sekirite LONU. Li destabilize sekirite rejyon an san nesesite epi ogmante tansyon yo. Nou kondane ak tout fos nou, zak sa a e nou mande Kore di No sispann komet zak ilegal ki destabilize rejyon an. "
Harris reafime angajman Etazini vizavi alye li yo nan rejyon Endo-Pasitik la.
"Ansanm, peyi ki reprezante isit la pral kontinye ankouraje Kore di No pou'l pran angajman poul patisipe nan diplomasi. Mwen vle remesye lide sa yo tou pou diskisyon yo kontinye fe nan objektif sa a ak anpil lot sije enpotan. Mwen remesye nou pou rankont jodia."
Kore di Nò lanse yon misil balistik ente-kontinantal ki ateri tou pre lanme peyi Japon. Se zeyem ese li fe mwa sa a kote li montre kapasite li pou'l lanse atak nikleye ki ka frape teritwa Ameriken.
Han Duck-soo, Premye Minis Kore di Sid di peyi li konsidere lansman an tankou yon pwovokasyon.
Dapre responsab Sid Koreyen ak Japone yo, misil Kore di Nò a vole apepre 6 mil kilomet e li te gen yon altitid apepre 1,000 kilomet.
Premye Minis Kanadyen an Justin Trudeau te kondane lansman an tou.
"Kanada rejwenn alye nou yo pou kondane seveman zak iresponsab Kore di Nò kote li lanse plizye misil. Jan zanmi yo di se yon vyolasyon kle rezolisyon LONU e fòk tout peyi nan rejyon an ak nan mond lan kondane'l tou."
Trudeau di Kanada pral kontinye patisipe nan operasyon milite konjwen nan rejyon an nan kad Operasyon Neon ansanm ak alye yo pou asire Kore di Nò sispann menas li yo.
Etazini te kritike tou swit lansman an e semante pou l pran "tout mezi ki nesese pou garanti sekirite teritoryal li ak sekirite alye li yo, Kore di Sid ak Japon.
Enfomasyon pou repotaj sa a soti nan Associated Press
