“Yon bon pèfòmans pou ADIH (Asosyasyon Endistri d Ayiti) pou Ane 2018 la”
Se sou tit sa a jounal ayisyen Le National, nan edisyon madi 15 janvye 2019 la, pibliye yon atik kote li prezante bilan aktivite ADIH pandan ane 2018 la daprè chif asosyasyon an, li menm, rapòte. Bilan an pran an konsiderasyon aktivite ADHI pou peryòd ki sòti nan mwa janvye pou rive nan mwa novanm 2018.
Nan entwodiksyon atik la, jounalis Cluford Dubois rezime done asosyasyon an bay sou evolisyon divès paramèt ki reflete pwogrè ou absans pwogrè nan sektè komès ak endistri a. Pa egzanp,“ kantite anplwaye nan sektè tektil la sòti nan 48, 820 an 2017 pou l rive nan 52,950 pandan ane 2018 la. Pandan yon peryòd 11 mwa, sòti nan oktòb 2017 pou rive nan septanm 2018, volim enpòtasyon an te sòti nan 720,226 dola ameriken pou l monte rive 926,276 dola US.”
Detay:
"Pandan ane 2018 la, peyi a te sibi divès boulvèsman sosyo-politik ak ekonomik aprè mouvman leve-kanpe vyolan ki te dewoule nan mwa jiyè a. An fèt, sòti 6 pou rive 8 jjiyè 2018, magazen ak antrepriz yo te viktim zak-piyaj. Sektè soutretans la te pran yon gwo kou."
"Bilan ADIH la konsène sitou sektè asanblaj pou abiman an. An fèt, pandan ane 2018 la, kantite moun ki te travay nan sektè tekstil la te ogmante pou bay yon efektif 52,950 anplwaye; pami yo, 10,019 te travay nan CODEVI, nan Wanament, epi 12,636 te travay nan Pak Endistriyèl Karakòl la (PIC), swa 2 zòn ki sitiye byen lwen kapital la, Pòtoprens.
"Nan mwa d oktòb 2017, alòske kantite total enpòtasyon yo te rive nan chif 720,226 dola ameriken, responsab yo te konstate yon ogmantasyon enpòtan nan mwa septanm 2018 la kote chif la te monte rive 926,276 dola ameriken."
Diferan Reyalizasyon Asosyasyon Endistri d Ayiti Pandan Ane 2018 la
Atik Le National la ajoute kèk kòmantè sou reyalizasyon ADIH pandan ane ki pase a:
"Nan bilan sa a responsab yo prezante diferan reyalizasyon asosyasyon an fè pandan egzèsis 2017-2018 la.
Pandan egzèsis sa a, sant fòmasyon Pak Endistriyèl Metwopoliten an (PIM) te òganize gradyasyon 7 pwomosyon, avèk 1326 operatè, 251 ouvriye pou kontwòl kalite, tandiske 47 sipèvizè te resevwa fòmasyon gratis gras ak pwojè USAID/LEVE. Kèk nan ouvriye fòme yo deja jwenn travay nan sektè endistri a, tandiske lòt yo pare pou yo antre nan domèn nan… "
"Nan bilan sa a responsab yo fè konnen yo regrèt reta ki genyen nan konstriksyon 4 bilding pwodiksyon nan pak endistriyèl metwopoliten an, SONAPI, malgre pwomès ki genyen nan yon kontra Leta Ayisyen te siyen, an 2015, ak pi gwo konpayi fabrikasyon rad Kore di Nò a. Sou pwen sa a responsab yo di nan bilan an:
3 zan apre, se yon sèl bilding pwodiksyon ki egziste kote 1600 ouvriye ap travay, alòske pwojè a te prevwa travay pou omwens 5000 lòt nouvo anplwaye.”
Responsab ADIH yo fè konnen tou envestisè etranje yo –koreyen, taywanè, srilankè ak lòt ankò- ap plenyen poutèt yo manke jwenn sipò nan men biwo Leta konsène yo. Men yon pati nan sa k di nan bilan an:
"Konpayi taywanèz Everest Textiles, ki fè pati Far Eastern Group e ki te envesti nan konstriksyon 3 bilding pwodiksyon nan Pak Endistriyèl Karakòl la (PIC), genyen jounen jodi a plis pase mil ouvriye. Men konpayi sa a ap konfwonte anpil gwo pwoblèm, paske enstitisyon Leta yo (OFATMA, AGD, SONAPI) pa fè travay pa yo kòmsadwa.“
--------------------------------------------------------------------
Otè atik la: Cluford Dubois (Le National)
Tradiktè: J. Lyonel Desmarattes (VOAKREYOL.COM)
