Lèzetazini te di ane pase a ke li tapral oganize Rankont o Somè Dèz Amerik 2022 a lakay li, responsab yo te gen anpil espwa dèske evenman an tapral ede repare dega ki te fèt nan relasyon yo epi re-afime dominasyon Etazini nan moman La Chinn ap taye zèb anba pye Ameriken toupatou nan Amerik Latin nan.
Sepandan, kèk jou sèlman anvan rakont la komanse nan vil Los Angeles, Prezidan Joe Biden ap fè fas ak plizyè defi.
Dezakò sou ideyoloji ak kiyès yo ta dwe envite, mefyans sou angajman Etazini vizavi Amerik Latin nan ak dout dèske yap kapab siyen ako enpòtan sou migrasyon ak kowoperasyon ekonomik deja jete vèni sou rankont la, dapre analis yo.
"Ameriken yo fè move kalkil pa rapò ak sityasyon an e yo pat prevwa ke tap gen mekontantman vizavi kiyès ki tapral asiste somè a, Andres Rozental, yon ansyen minis afè etranje adjwen Meksiken deklare. Misye di somè a kouri risk pou'l blèm.
Gen yon responsab Ameriken ki pale ak Reuters sou kondisyon yo pat site non li ki admèt "te gen plis dezòd pase sa nou te prevwa" pandan nou tap fè preparasyon yo.
Evenman ki mwen enpòtan yo ap tanmen Lendi, epi apre sa lidè yo pral kòmanse rive.
Biden gen pou'l patisipe nan somè a Mèkredi, kote li va louvri premye Somè Dèz Amerik Etazini patwone depi premye fwa yo te rankontre an 1994.
