Yon jij nan Nouyòk pase lòd bay aktè nwa Ameriken Jonathan Majors pou l suiv yon pwogram espesyal kap dire yon ane ak yon konseye, men li evite pran prizon apre li te bat ex-menaj li.
Pwosè a, ki soulve anpil atansyon Ozetazini, deraye karyè aktè a, ki te sou wout pou l ranpòte anpil siksè ak renome.
Misye gen 34 an, e li se vedèt film "Creed III" ak plizyè lòt film sinema. Lajistis jwenn ni koupab de atak epi arsèlman pandan yon pwosè ki te dewoule nan vil Nouyòk nan mwad Desanm nan.
Apre jij la te pwononse desizyon li, studyo sinema Marvel Studios te kite misye tonbe, malgre yo te chwazi l pou jwe vilen an nan pwochen seri film li yo ki baze sou ti komik popilè. Yo pap konsidere l non plis pou pwogram televizyon ditou pandan ane kap vini yo.
Kondanasyon an lye ak yon kont ki te pete nan mwad Mas pase a, kote menaj aktè a nan epòk la, Grace Jabbari te akize l dèske li te atake l nan yon machin. Sepandan, Majors di se mamzèl ki atake l.
Dapre temwayaj ki fèt pandan pwosè a, Majors di menaj li te li yon teks li te resevwa nan men yon lòt fi epi li te byen vekse ak jalouzi.
Dam lan bò kote pa li di misye atake l nan machin nan, li frape tèt li ak men l, tòdye bra li epi rale dwèt li tèlman fò zo dwet la te fele.
