Madam Marta Havryliuk ak pititgason li, Ostap, t a viv nan vil Busk, nan Ikrèn, lè Larisi te anvayi peyi a. Pandan Mata t ap pale ak Lavwadlamerik depi Vasovi, nan Polòy, li deklare:
“Pou kòmanse, nou t ap ezite; paske n pa t konnen si pou n te kite peyi a oubyen rete. Men apre sa, lè bonbadman yo t ap pwoche pi pre nou, sitiyasyon an te vin bay gwo kèsote. Mwen te pè pou pitit mwen an. “
Se konsa Madan Havryliuk te fin pa deside pati al jwenn yon sè li k ap viv nan Eta Ilinwa, Ozetazini. Li te monte nan machin li ak Ostap epi yo te pran direksyon Lapolòy. Apre 7 kilomèt nan wout, yo te deside pran a-pye akoz yon blokis ki te twò long.
Lè manman ak pitit te rive Vasovi, yo te lwen toujou ak destinasyon final yo, Eta Ilinwa. Menmsi Prezidan Joe Biden deja di Lèzetazini dwe pare pou l resevwa refijye ikrenyen yo, pwosesis tablisman yon moun nan yon lòt peyi kapab pran ant 3 e 5 ane. Vandredi 11 mas la, lidè ameriken an te deklare:
“Mwen pral resevwa refijye ikrenyen yo ak 2 bra. Nou dwe resevwa yo isi ak 2 bra ouvè si yo vle antre nan peyi a.”
