Seremoni envestiti Fritz Alphonse Jean kòm kowòdonatè Konsèy Prezidansyèl Tranzisyon (KPT) te dewoule vandredi 7 mas nan "Villa d’Accueil", Musseau.
Wo diyitè Leta, reprezantan kò diplomatik yo ak Maria Isabel Salvador, ki se reprezantan Sekretè Jeneral Nasyonzini an, te prezan.
Pandan diskou li, kowòdonatè sòtan an, Leslie Voltaire, te mete aksan sou lefèt ke pasasasyon pouvwa fèt nan respè youn pou lòt ak solidarite.
Sepandan, li te eksprime enkyetid li sou sitiyasyon sekirite Ayiti ki ap deteryore, pandan li te raple kèk reyalizasyon pandan administrasyon li a.
"Chimen an plen ak obstak, men n’ap mete tout fòs nou nan travay la," se sa Fritz Alphonse Jean deklare nan kòmansman entèvansyon li.
Li ensiste sou ijans sekiritè a, li fè konnen "peyi a nan lagè" epi li mande tout moun mete tèt ansanm pou fè fas ak sitiyasyon an.
Nouvo prezidan KPT a anonse ke yon akò pral siyen byento ant Lame d Ayiti (FAD’H) ak Brigad Siveyans Zòn Pwoteje yo (BSAP) pou ranfòse lit kont gang ame yo. Plis pase 3 000 rekri pral resevwa fòmasyon ane sa a nan polis la ak FAD’H.
Fritz Alphonse Jean fini diskou li an pandan li eksprime konpasyon li pou soufrans pèp ayisyen an fas ak vyolans lan.
"Pa gen plas pou divizyon," li ensiste, epi li lanse yon apèl pou tout sektè nan lavi nasyonal la mete men ansanm pou retabli lapè ak estabilite.
